‘‘อกฺโกธโนนุปนาหี , อมาโย ริตฺตเปสุโณ;
กลฺยาณสีโล โส [โย (สฺยา.)] ภิกฺขุ, เอวํ เปจฺจ น โสจติฯ
[505]
‘‘อกฺโกธโนนุปนาหี, อมาโย ริตฺตเปสุโณ;
กลฺยาณมิตฺโต โส ภิกฺขุ, เอวํ เปจฺจ น โสจติฯ
[506]
‘‘อกฺโกธโนนุปนาหี , อมาโย ริตฺตเปสุโณ;
กลฺยาณปญฺโญ โส ภิกฺขุ, เอวํ เปจฺจ น โสจติฯ
[507]
‘‘ยสฺส สทฺธา ตถาคเต, อจลา สุปฺปติฏฺฐิตา;
สีลญฺจ ยสฺส กลฺยาณํ, อริยกนฺตํ ปสํสิตํฯ
[508]
‘‘สงฺเฆ ปสาโท ยสฺสตฺถิ, อุชุภูตญฺจ ทสฺสนํ;
‘อทลิทฺโท’ติ ตํ อาหุ, อโมฆํ ตสฺส ชีวิตํฯ
[509]
‘‘ตสฺมา สทฺธญฺจ สีลญฺจ, ปสาทํ ธมฺมทสฺสนํ;
อนุยุญฺเชถ เมธาวี, สรํ พุทฺธาน สาสน’’นฺติฯ
… สิริมิตฺโต เถโร…ฯ
3. มหาปนฺถกตฺเถรคาถา
[510]
‘‘ยทา ปฐมมทฺทกฺขิํ, สตฺถารมกุโตภยํ;
ตโต เม อหุ สํเวโค, ปสฺสิตฺวา ปุริสุตฺตมํฯ
[511]
‘‘สิริํ หตฺเถหิ ปาเทหิ, โย ปณาเมยฺย อาคตํ;
เอตาทิสํ โส สตฺถารํ, อาราเธตฺวา วิราธเยฯ
[512]
‘‘ตทาหํ ปุตฺตทารญฺจ, ธนธญฺญญฺจ ฉฑฺฑยิํ;
เกสมสฺสูนิ เฉเทตฺวา, ปพฺพชิํ อนคาริยํฯ
[513]
‘‘สิกฺขาสาชีวสมฺปนฺโน, อินฺทฺริเยสุ สุสํวุโต;
นมสฺสมาโน สมฺพุทฺธํ, วิหาสิํ อปราชิโตฯ
[514]
‘‘ตโต เม ปณิธี อาสิ, เจตโส อภิปตฺถิโต;
น นิสีเท มุหุตฺตมฺปิ, ตณฺหาสลฺเล อนูหเตฯ
[515]
‘‘ตสฺส เมวํ วิหรโต, ปสฺส วีริยปรกฺกมํ;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[516]
‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;
อรหา ทกฺขิเณยฺโยมฺหิ, วิปฺปมุตฺโต นิรูปธิฯ
[517]
‘‘ตโต รตฺยา วิวสาเน [วิวสเน (สี. สฺยา.)], สูริยสฺสุคฺคมนํ ปติ;
สพฺพํ ตณฺหํ วิโสเสตฺวา, ปลฺลงฺเกน อุปาวิสิ’’นฺติฯ
… มหาปนฺถโก เถโร…ฯ
อฏฺฐกนิปาโต นิฏฺฐิโตฯ
ตตฺรุทฺทานํ –
มหากจฺจายโน เถโร, สิริมิตฺโต มหาปนฺถโก;
เอเต อฏฺฐนิปาตมฺหิ, คาถาโย จตุวีสตีติฯ
9. นวกนิปาโต